Mittwoch, 12. Oktober 2011

ISDSTE 2011 Folge 3

KANDIDAT 3 -Mount Kailash Base Camp

 

Bis au dä Video glade sich, möcht ich schnell was zum Thema "Ässe" in Tibet schribe: Riis und Yak gits. Für alli wo Yak nid kenn, das isch Yak:

DAS YAK

drzue Riis und es bizzeli Gmiess (wenn me Glück het). Zum Trinke gits entweder heisses Wasser, heisses Wasser mit e bizzeli Krüttli dinne (Jasmin oder Green Tea) oder BUTTER-Tea! Mein, uf mine Reise hani scho mehr als nur öbis gruusigs Gässe oder zumindest probiert... Aber Butter-Tea... Do drüllts dr Maage: Butter.Tea isch Yak-Butter, zur Erinnerig, das isch e YAK:

ebe: Yak-Butter mit Salz und heissem Wasser... Alles gstampft und griehrt in eme Gfäss und denn in schmuddeligi Trinkbächer inegleert... NIEMOLS, wirklich NIEMOLS sott me froge, was die bruune Stückli in dr milchige Flüssigkeit sind,- NIEMOLS. Und es isch au nid dr Koch, wo amme e Hoor verliehrt, wo denn im Tee ummeschwümmt, nei, das isch denn meistens es Yak-Hoor... Zur Erinnerig, das isch e YAK:


Zrugg zu unsere tolle Casting-Show und dr Frog, wells isch denn nun s hässlichste WC uf dr Wält??

Dienstag, 11. Oktober 2011

ISDSTE 2011 Folge 2

KANDIDAT 2 - Manasarovar


Bis s Video glade het und ich dä Itrag veröffentliche ka e klyni Gschicht us em Läbe vo eme Backpacker... Nenne mr se: Support us dr Heimat!

In Tibet, resp. in dr Chinesische Gränzstadt Zan hani bizzeli Gäld welle abhebe, drmit mr ab und zue mol was schiggs kaufe ka uf mim Trip durch Tibet... Kärtli ine, Code igeh... Kärtli wäg!!
Mit Händ und Fiess hani de Bank-Mitarbeiter könne klarmache, dass ich mis Kärtli zrugg bruch, wills das in ATM inezoge het... Ich has de au zrugg beko... Zum Glück,- funktioniert hets leider nüm!! Jä super!! Also Back-Up hani jo no mini VISA gha, aber glich,- rächt miehsam!!
Jedefalls hani denn durch mini Eltere usegfunde, dass s Kärtli gsperrt isch, will dä ATM als "nid sicher" izsteuffe gsi isch... (Scho mol was vom Reise ghört??) es isch denn nätt bätte worde, mi Kärtli wieder freizschalte, es sigi alles OK, und ich würdi Gäld bruuche!!Das sigi leider nid möglich... ICH müessi persönlig bi dr Bank verby ko... (HAHA!! nid lustig)... ha denn d Idee gha, me söll mir doch mol e neue Code schicke... (YEAH!) hani denn au beko, ich ha dä nätte BLKB Mitarbeiter sogar e Karte us Tibet gschickt (wo nie ako isch, wie alli andere Karte vo dert,- Sorry: Anouk, Fabienne, Grossmami und Andrescheee!!). Ich mit voller Vorfreud uf s Telefon vo mine Eltere gwartet, ufe Code... Hmm... Zum dr Code z aktiviere muess me als ersts ane BLKB Bankomat go... I LOVE SWITZERLAND!! :-p

Kandidat 2 - Manasarovar isch unterdesse Online,- viel Spass bim luege!! :-p

Z bemerke an dere Stell isch no, dass es in  Manasarovar wildi, bösi und hungrigi Hünd git...


Montag, 10. Oktober 2011

ISDSTE 2011

Ihr kennet DSDS, GNTM, GA, DH, TVD... oder wies Fanta4 mol besunge hei:

FANTA 4 - MFG

So wie dr Ditaaaa regelmmässig e mittelmässig bis erfolgloose Sänger sucht, ha ichs mi in Tibet ere andere Challenge gstellt und ha so ganz im Trend vo dr Zyt und Casting-TV-mässig:

ISDSTE - Inchen sucht die schrecklichste Toilette EVER verastaltet

Gärn möcht ich, bevor ich die drei Kandidate in s Renne um Ruhm und Ehr schick, schnell die üssere Umständ kläre:
  • Temperatur: 0 - -20 Grad
  • Höhemeter: 4800 - 6300
  • Casting Ort: Prayang, Manasarovar, "Base Camp" Mount Kailash
  • Spiegel: Keine
  • Duschen: all 10 Tag ei mol
Warnhiwyys!! Es folge Videos us dr Kategorie: die UNGESCHMINKTE Wahrheit, drum: wer das nid will seh, jetzt wägglicke :-P hehe...

KANDIDAT 1 - Prayang

Morn wird denn Kandidat 2 - Manasarovar vorgstellt... Me ka gspanne si!!

Freitag, 8. Juli 2011

Roof of the World

A M A Z I N G   T  I B E T !!



Wo soell i au nur afo...?
Vom 26.04. - 07.05. bini zum Abentuer (und wie i spoeter ha muesse feststelle au d Herusforderig) vo mim Laebe gstartet. Mir si drei Luet in minere Reisegruppe gsi, zwei Russinne und ich, NASTROVJE!! Ah, mir hei au no e Guide, und e Driver drby gha, isch obligatorisch in Tibet (waege de fiese-miese Chinese :-p).

no optimistisch...

Vo Kathmandu us reist me z erst zur Graenze nach Kodari, 6 Stund Jeepfahrt fuer 150km. Und das isch kei Zuckerschlaecke gsi, Froelein Schneider isch naemlig am Obe vorher mit e paar Amis uf dr Piste gsi, und s Schuettle und Ruettle vom Jeep het mim Mage nid so guet do :-p.

In dr Graenzstadt Zhungmu hani denn s erste mol Bekanntschaft mit dr Hoehekrankheit gmacht, has aber dert no als "Hangover" i gstueft. I ka euch sage, das isch denn oebis gaaar nid lustigs :-(... Vo gottsjaemerlichem Kopfweh, Apetitlosigkeit, Schlaecht-si zu Kreislaufzaemmebruech, alles drby gsi... Und das drei Tag lang. Ha also wuerkli denkt i muess staerbe...!!

Zhungmu
Unseri ersti Nacht hei mr in Naylan verbrocht wo mr de au festgstellt hei, dass es kei Heizig git in unserem Hotelzimmer, - dusse hets unterdesse afo schneie. Die fehlende Heizige si denn zur Tradition worde, genauso wie s Fehle vo "richtige" Badzimmer, geschweige denn ere Duschi! In Naylang si mr denn 2 Tag blibe, zur Aklimatisierig. Wo mr de am 3. Tag ufbroche sind richtig Saga isch mr wieder einigermasse guet gange (Antibiothika, Dafalgan 1g und Medis gege Hoehekrankheit sei Dank!). Uf halbem Waeg hei mr dr 5050m hohi Lung La Pass erreicht, SAGEHAFT!!

Lalung La Pass

In Sage hei mr denn wieder e Heizig gha im Hotelzimmer... Resp. e Fuer... Und agfuehrt hei mr mit Dunk, oder zums anderst usdrucke (SORRY!) mit Yak-Kacke. Schmeckt nid sehr fein, und au dr Rauch im Hotelzimmer lost eim irgendwie nid guet schloofe, will me Angst het, me stirbt an ere Kohlemonoxydvergiftig.... Hei eifach druff vertraut, dass die Tibetaner :-D scho wuesse, was sie mache!
KISS FROM HEAVEN
Zwüsche Nylam und Saga

"Heizig"
Vo Saga simmer in e klyses Seeledoerfli gfahre, nach Prayang, wo mr in eme Hotel gschloofe hei. S erste mol isch de au d Toilette "dusse" gsi... Unterdesse isch d Temperatur vo 30 Grad Kathmandu, zu ca. 0 Grad tibetischi Pampa gsunke. Prayang isch aber suscht mega harzig gsi, und d Luet dert eifach haerzlich und nett!!

Kinder in Prayang
Im naechste Dorf isch denn dr heiligi See Mansarovar gsi. Das isch au s einzige gsi, wo a dem Ort speziell gsi isch... Ah nei, no was anders: es het im ganze Dorf nur ei Toilette geh, 5 Minute Fuesswaeg zu unserem Guesthouse... SUPER :-p hihi...
Ich und vieli toti Küeh


Toll e WC... NOT!
In Darchen isch denn unsere letschte Stopp gsi, vor em Kora um dr Mount Kailash. Das Hotel, isch denn trotz fehlender Heizig mega suuber und schoen gsi. Und au do, d Luet eifach nur mega freundlich und naett.
Mir si am Morge frieh zum "Kora" gstartet und ca. 2 Stund durch e MEGA Landschaft gloffe.
Sehr nätt vo mir :-D

Teekoche uf tibetisch...
Mount Kailash

Leider het denn mini Huefte afo zwicke und mit witerlaufe isch nuem so lustig gsi :-(. Autos sind uf dere Strecki verbote und wo mr vo witem e Jeep gseh hei, hei mr gwuesst was das beduetet... Dr LAMA kunnt! Dr Lama isch sowas wie dr buddistischi Chef-Moench und mi Guide het kurzerhand si Jeep aghalte und gfrogt oeb er mi mitnimmt, was er denn au gmacht het :-). Bi dr Monestry/ em Guetsthouse ako, isch er usgstiege, het mini Haend gnoh und sini Stirn gege mini gstupst :-D. Most spiritual moment in my life!!
Do mini Hueft nid besser worde isch het mi Guide e Moeglichkeit muesse finde, mi vom "Base Camp" wieder zrugg nach Darchen z schaffe... Er het mir denn e Hors und e Horsman organisiert...5 Stund in eme Pfaerdesattel isch denn nid wuerkli bequem, aber dr ritt zrugg durch die wahnsinns Landschaft isch eifach nur MEGA gsi!!

2 Tag spoeter si denn au mini zwei Russinne und dr Guide vom "Kora" zrugg ko, leider nid ganz heil... D Olga het sich ihri Auge verbrennt in dr Sunne, d Oksana ihri Lippe und unsere Guide s ganze Gsicht... Die hei usgseh!! Do bi ich mit mine +500000 Summersprosse also grad heilig drgege...

Wäg do!!

Tibet isch wohl d (Grenz)erfahrig vo mim Laebe gsi... Dr Kampf gege d Hoehekrankheit, 7 Tag ohni Duschi und Hoorwaesche... Ueberwindig vo ekel, Toilette wos ineschneit... Yak-Fleisch esse, Buttertee trinke (was oebbe s haesslichste uf dr Waelt isch) Und dem gegeueberund e atemberaubendi Landschaft, es mega Land... Luet wo trotz Unterdruckig und Armuet so viel Laebesfreud usstrahle... Wenn i jetzt zrugg denk, bini froh, hani das Land doerfe seh, die Mensche doerfe erlaebe und isch es amme au no so schweer gsi unds mr sehr mies gange, will i die 12 Tag um nix misse!!

No schnell e paar Gebätsflagge ufhänge zum Schluss :-)

Freitag, 20. Mai 2011

Du hesch doch e Vogel...

... nei, FALSCH!! Ich BI e Vogel :-D


und no es paar witeri Impressione vo mim MEGA Paragliding Flug in Pokhara:

Naegste Stop isch denn, am Sunntig... jetzt kanis jo verrote: DUBAI :-). Mini Tage in Nepal si also langsam aber sicher zaehlt und i mach mi ufe Waeg in Richtig Schwitz... Aber ebe, so es bizzeli *bling-bling* uf em Ruckwaeg muess denn halt glich no si :-). *freu*
Adieu

Mittwoch, 18. Mai 2011

The Adventure Of Inchen & Princess Diana

Vom 11.05-15.05. bini fuer e Kurztrip nach Pokhra greist. Pokhara saelber isch e mega haerzigs Staedtli direkt an eme See (Name hani vergaesse). Me het ky es Mittelmeerfeeling, wenn me am Obe an dr Promende sitzt in eim vo de viele Restaurant oder Kaffis. Die Tage hets in Nepal aber e Huffe Streik geh, und drum isch mehr oder weniger alles gschlosse gsi. Beautiful Pokhara wird zum langwiligste Ort uf dr Waelt!!

Am erste tag wo i dert gsi bi (wo nonig gstreikt worde isch) hani denkt: Fahr doch mit eme Velo ume See, denn machsch au no grad was fuer dini Fitness :-).  Ha mi also uf d Suechi nach eme Velo gmacht. Ueberall hei sie die super-moderne, aber au super-tuere Mountain-Bike vermietet (Tagesmieti, ca. 12 Dollar) und dr Schott in mir het das nid welle zahle. Ich ha denn in eme Sitestroessli d "Princess Diana" gfunde: e wohri Schoenheit! E rote Rahme mit pinke Bluemli und Harzli druff und eme Schriftzug, ebe: Princess Diana. Es het es Koerbli dra gha und ZWEI Glogge (wer mi Velo deheime kennt weiss, i mag mehr als ei Glogge/ Huupi). Wer brucht also scho super Braemse und Gang, wenn er mit er Prinzessin ka ummefahre? Mir hei is gsuecht und gfunde und sind, oebbe am 11i zu unserem Abentuer gstartet!


Uf em Waeg hani immer wieder vo Luet wo in Pokhara und dr Umgaebig laebe ghoert: Was... Umme See?? Das isch nie moeglich!! Ha, vowaege, hei mir uns denkt! Und sind mr mol ehrlich... SIE, seht jo eh nid so vertrauenswuerdig us:


Nach ca. 3 Stunde fahrt (und eme 7te Stossgebaet, es soelle doch bitte Gaeng an d Princess Diana wachse!!) hani se denn zum erste Mol miesse traege... Ueber e Brugg. Das hani denn no 2 mol miesse mache, will Stei, oder suschtigi Sache im Waeg gleage sind... Aber immer no: mir si motiviert gnueg gsi, um dae See z fahre!!
Au no, nachem i 2 mol in nid so guetschmoeckendem "Schlamm" (oder so) steckeblibe bi:


D Waeg sind immer aenger worde und, nenne mrs mol "unfahrbarer", aber glich... Mir si flissig witer gradlet, pflaetschnass und mied... Ufgeh isch kei Option gsi:


Ich ha d Princess Diana denn nach ca. 5 Stund e Huubel duruff treit, und gschoobe und mit allne mitel fuer uns wierkaempft. Obe ako isch e Sackgass gsi... I ha den eine vo de Manne dert in dem klyne Doerfli gfrogt, wo i muess durefahre fuer nbach Pokhara... Er het in d Richtig zeigt, vo wo i ko bi. ENDSTATION! Umdruelle isch kei Option gsi, fuer das bini viel z unmotiviert und d Diana viel z verschlammet gsi... Also het mr dr gueti Herr abotte, e "Boatman" z organisiere. Gesagt getan, hei mr is nach kurzer Zt uf em Waeg abwarts befunde:


Und sind aschliessend in 2 Fischerboot verlade worde. Zaemme mit Aescht (kei Ahnig was die mit dene gmacht hei) und es paarne andere Luet (Iheimischi, nid uebermotivierti Touristinne). D Ueberfahrt mit em Boot isch oebbe 1.5 Stund gange und i ha mi mit de Nepalis unterhalte, wo ueberraschend guet Aeschlisch gredet hei. Mir hei is abgwachslet mit Paddle und Sunneschiirm hebe :-D. Nach ca. einere Stund hets afo raegne, und gwittere was denn uf dem See, in dere Nussschdaale nid nur lustig gsi isch.  


Am Aendi hei mi die Nepalis uf em Boot den no naett uf e Milk-Tea iglade, was i dankend agnoh ha, do mr voll verraegnet, pflotschnass gsi sind und mied, und demotiviert und ueberhaupt... 
Alles in allem isch es glich e lustigi und schoeni Erfahrig gsi! Hani doch s erste mol Nepalis kenneglernt, wo nid hinter mim Gaeld haer gsi sind, und mi au nid hei welle Foetele waege mine blonde Hoor... :-D haha...


So, i haus jetzt mol go Znacht aesse und denn luegi eine vo de DVDs wo i gester kauft ha. 1.22 CHF fuer "Fighter", "Blue Valentine" oder "Limitless" isch glaubs kei schlaechte Deal, wenn me bedenkt, dass die in dr Schwitz grad im Kino laufe :-) chch...
Adieuuuu! X

Sonntag, 15. Mai 2011

Swissland, I love U more than my blood!


Do daenkt me sich nix boeses, hockt in Pokhara in eme Resturant und denn fot dae gueti Herr afo singe... und wie :-p chchch... FREAK?!?

Ich bi zrugg in Kathmandu, no fuer ei Wuche befor i mi langsam, aber sicher wieder in richtig Heimat mach (Phuuu!!). Ich wird die kommende Tag denn wieder es bizzli flissiger bloge, was i die letschte drei Wuche so gmacht ha. Vo atemberaubende Bilder us Tibet, ueber e kreischends Ich bim Paraglide... E witere Iblick in die unvergaesslichi Reis :-).
Bis dert hi: ADIEUUUU!!



Samstag, 16. April 2011

PATAN

Huet bini mit dr Laurie (mire momentane Reisebegleitig) in Patan gsi. Patan lit oebbe 11km usserhalb vo Kathmandu und isch e mega schoens Stadtli... Het fast ekly e mediterrande Flair gha, ab und zue.
Do es paar Bilder vom Stadtli:




Natuerlich gits au in Patan, wie ueberall in Nepal, e Durbar Square... Seht eigentlich immer glich us und isch drum... Naja, nenne mrs mol "maessig spannend" aber glich no beidruckend:





und e suuubere Abgang:
Nach em Durbar Square simmer denn ekly durch d Gaessli vo Patan gloffe und si, fast dr ganzi Waeg vo Kinder verflogt worde... Wo mr natuerlig hei muesse foetele und wo aschliessend nach Schoggi gfrogt hei... Neh, aber vo uns gits kei Schoggi, will die arme Bibbeli ihri Zaehn nid koenne putze und eh scho fest wieschti, kaputti Zaehn nei... Hmm...

 Eme Bueb si Huustierli,- e Babymuus
Laurie mit de Kinder

Aendlig reis i mol nid so ganz allei und ha d Moeglichkeit au mol uf eme Foeteli z si :-) hihi... Hani natuerlig grad usgnuetzt und kly faxxe gmacht... Mit maessigem Erfolg:

 Knue: BUM!
Jetzt: Autschi!!

Mol ehrlich gseit: haettet dr was anders erwartet... Neh, oder ;-). Aber isch OK... Isch jo s Knue vo dr eh scho zwickende Huefte und somit nid soooooo dr Red waert. i wird eh in noegster Zyt  nid so viel Reise. Besser gseit: ich blib bis am 26.04. in Kathmandu, und gang den 2 Wuche nach TIBET :-D es het klappt! Ich mach nid d Touriste-Tour, sondern die (sehr) tueri Overland-Tour mit Jeep, Yak und Trekking... Es erwarte mi Baerge, Schnee, -5 Grad, ei Nacht in eme fest warme Schloofsack unter Starnehimmel uf 5000m hoehi und wohl e mega Panorama :-). Langwilig wirds eim in Kathmandu nid wuerklich... I triff mi am Morge mit dr Laurie zum Zmorge, und dr Raest vom Tag verbringe mr mit Laese, Tratsche, und in d Bakery go Stueckli aesse :-D hihi... Ah, am DO hei mr no e paar Nepali haessig gmacht. Mir hei im Restaurant gfrogt, ob er aecht dr Saender ka umstelle... Waeg vom HOCHHEILIGE Cricket (so e doofe Sport!!) uf folgendes:

GO ROGER!!

Mir luege also au no kly Tennis, oder CL Zaemmefassige, woby do jo nur no Krutt gege Kabis spielt :-p chch... Am noegste Mittwoch hani denn no was vor, aber das verrrot i nonig z viel... Nur: NO.7 und Bambus... Will see!! Hoff aber s klappt :-). So, i haus denn mol go zNacht aesse, resp. an d Happy Hour und denn go Aesse :-). Adieuuuu Adieuuu

Dienstag, 12. April 2011

NOT-OPERATION IN DEN BERGEN

e Drama in 5 Akt
Nadine Schneider
2011

Akt 1 - Lumbini
Am Samstig bini mit dr Amelie und ihrer Schwoester, dr Claire nach Lumbini gfahre. Lumbini isch e klyni Graenzstadt zwuesche Indie und Nepal und au dr Geburtsort vom Buddah. 
Es isch meassig toll gsi, zums naett uszdrucke. 42 Grad und in mim Zimmer ca. 50 bluetluesterni Moskitos wo mi hei welle... :-p chch... I ha nach eme Muggenetz gfrogt, gits nid... Hets gheisse (dodrzue spoeter mehr). Ich bi also am 8i zObe in mi Zimmer und in die ehrehafte Fuessstapfe vo mim Vorfahr, em tapfere Schniderli traette: I ha zwar nid 7 Moskitos uf s mol braetscht, aber 4 :-) die ganzi Nacht dure ca. 27... ha irgendwenn ufhoere zaehle. Ich ha KEI aug zuedoh, denn s Antibru het nid gwuerkt, und so ka me jo au nid wuerkli pfuuse, oder? Wer mi kennt weiss, dass i eigentlig nur in 3 Faell haessig bi: wenn i hunger ha, wenn i mied bi, und wenn me mi am Mentig Obe stoerrt :-p chch... Voll uebermiedet bini also ins 42 Grad warme Lumbini go luege, wo dr Buddah gebore isch. Das isch es denn au scho gsi, mehr gits dert nid:

Nach dr erste Nacht (und will i mied und somit fest haessig gsi bi) hani kly Terror gmacht in mim Guesthouse, i ha e Moskito-Netz welle, unds au beko :-) (Randbemerkig: sag, du bisch brueflich unterwaegs und schaffsch fuer Lonely Planet :-) hihi...). Mi Netz isch ca. 2 cm uebr mim Nasespitz ghange, so isch au die Nacht nid nur agnaehm und entspannend gsi... Zu allem ueberfluss isch denn au no mi MP3 Player usgfalle und i ha die ganzi Zyt SsSsSsSsssss... ghoert... No weniger lustig isch dae Usflug worde, wo i am noegste Tag (immer no mued = haessig) in Mini-Bus igstiege bi... Die ganze 7 Stund hani denkt: das isch es gsi, du bekunnsch e Trombose und denn isch das di Aend, in eme klyne, heisse, stinkige Bus %-). Aber daem nid gnueg, ha i e Sitznochber gha (wo nid guet gschmeckt het) und mr immer gseit het: Nepali Daaaaaah! Kei Ahnig was das heisst... Aber nach 2 Stund hanen aglaechlet und gseit: Hey, jetzt bettonier di de grad an d Wand, Tschole!! Hani erwaehnt, dass i naebst dr Uebermuedig au no e riese Brumschaedel gha ha??

Oebis guets kani dem Trip denn trotzdem no ahaenge: d Fahrt nach Lumbini (emel die letschte 2 Stund) isch eifach UNIQUE gsi!! Mega,- uf em Dach vo eme Reisebus :-) iiiha!!

 

und au zrugg hei mr vo Narangath ei Stund e lustigs Transportmittel gha :-) 

 

Akt 2 - Dengue?
Ich bi mued, kaputt, ha kei Hunger und Buuchweh... Bestimmt Dengue!! (Backpacker Humor, sorry!) Nei, die letschte 4 Tag 21 Stund Busfahrt und kum schloof, d Hitz und e bloede Buuch, bi eifach duure und bruch mol kly schloof und e freudigs Erlaebnis...

Akt 3 - R.I.P.
2008 in Bali hani mir es paar Flip-Flop kauft, schoeni Laeder-Billabong fuer 10 Dollar, sie hei mit mr Bali erlaebt, sind in NY und Washington gsi, am Birskoepfli, in Californie, in Vegas, in Nepal... Und sit gester hei sie e boeses, fetts Loch in dr Sohle :-( Buhuhuhuhu...

Akt 4 - NOTOPERATION
Was isch das?

Niemerds...?? Ok. Es isch dr Filter vo minere Camera :-O. Uf em gruesigste WC ever hani mini Tesche an e rostige Nagel ghange, wo NATUERLICH abbroche isch... Baeng!! Dr Filder versprunge, dr Ring verboge, nid vom Objektiv z loese.... Ha denn zwei Duetschi nach eme Sackmaesser gfroggt und in de Baerge zwuesche Chitwan und Kathmandu e Not-PO duregfuehrt... Es si ebe klyni Glasteili uf dr Linse glaege und i ha s kaputte Glas mit em SCHWITZER ARMEESACKMAESSER usebroche und jo... Jetzt isch wieder OK. Eifach ohni Filter und somit au ohni Schutz :-(. Und waer das nid alles scho gnueg (frog mi was i gmacht ha, dass i so mieses Karma zieh im Moment) kunnt dr Schlussakt...

Akt 5 - Tibet
In Lumbini, resp. uf em Busdach hani d Laurie kennelernt, e Krankeschwoester us Genf, glich alt wie ich. Sie het mr verzellt, dass sie grad am Reise isch, und ihre Pass in Kathmandu lit, fuer es Visum nach Tibet. D Graenze sind gschlosse, aber am SO Obe isch s Telefon ko, dass sie ab em MO offe sind und sie am 16.04. ka nach TIbet ireise. Kurzerhand hani all mini Plaen fuer Pokhara ueber e Huffe gworfe (kei Yoga, kei Trekking, kei Paragliding) und bi huet zrugg nach Kathmandu greist. I ha ebe am SO mit dere Agency telefoniert wo dr Laurie ihre Trip buecht het und die hei gseit, wenn i bis am MI in Kathmandu bi, kani am SA nach Tibet: KEI PROBLEM!!
So, Lektion 1: vertrau NIE eme Nepali... In Kathmandu ako (was nid wuerkli e schoene Ort isch!!) bini zur Agency zum mi Pass abgeh und denn heissts: oh, d Graenze isch wieder zue... Kum morn nomol! Immer no mied (hassig) und hungerig (haessig) hani fest tief duregschnuuft und ha gseit: OK... :-(. Muess jetzt morn nomol go und hoff, dass es denn no klappt!! Fest Dume drucke bitte :-).

So, i gang jetzt go Frust-Shoppe...!! Kly *bling-bling* fuer d Seel ;-) hihi...
Adieuuu...